Ҷалби муташаккилонаи шаҳрвандони Тоҷикистон барои фаъолияти меҳнатӣ дар Россия
Муҳтарам шаҳрвандон,
Ба иттилои Шумо мерасонем, ки имкониятҳои шуғли меҳнатӣ дар Федератсияи Россия дар доираи Созишнома байни Ҳукумати Федератсияи Россия ва Ҳукумати Ҷумҳурии Тоҷикистон оид ба ҷалби муташаккилонаи шаҳрвандони Ҷумҳурии Тоҷикистон барои фаъолияти муваққатии меҳнатӣ фароҳам оварда шудааст.
Барномаи мазкур як қатор бартариҳои муҳим дорад. Пеш аз ҳама, шаҳрвандон бо кори қонунӣ ва бехатар таъмин мешаванд, зеро шартномаи расмии меҳнатӣ кафолати музди меҳнат, пардохтҳои иҷтимоӣ ва ҳифзи ҳуқуқҳоро таъмин мекунад. Илова бар ин, иштирокчиён ба ҷойҳои кори серталаб дастрасӣ пайдо намуда, метавонанд сатҳи тахассуси худро мутобиқ ба меъёрҳои Россия баланд бардоранд.
Ҳамзамон, раванди сафар ва ҳуҷҷатгузорӣ содда гардонида шудааст: тамоми санҷишҳои зарурӣ, аз ҷумла тиббӣ, биометрӣ ва ҳуқуқӣ, дар ҳудуди Тоҷикистон гузаронида мешаванд. Инчунин, барои иштирокчиён имконияти омӯзиши забони русӣ, таърихи Россия, асосҳои қонунгузорӣ ва гирифтани омодагии касбӣ фароҳам аст.
Барнома инчунин дастгирии тиббӣ ва иҷтимоиро пешбинӣ мекунад: муоинаи тиббӣ пешакӣ гузаронида шуда, корфармоён уҳдадоранд суғурта ва дигар кафолатҳои иҷтимоиро таъмин намоянд. Назорати фаъолияти корфармоён пурзӯр буда, ин ҳолат ҳифзи ҳуқуқи кормандонро таъмин мекунад. Дар маҷмӯъ, барнома ба фароҳам овардани шароити муносиб барои меҳнат ва ҳамгироии шаҳрвандон мусоидат мекунад.
Тартиби иштирок содда ва шаффоф мебошад. Аввалан, довталаб бояд ҷойи кори мувофиқро тавассути платформаи «Работа в России» интихоб намояд. Сипас, барои иштирок ариза ба мақомоти ваколатдори Вазорати меҳнати Ҷумҳурии Тоҷикистон пешниҳод карда мешавад. Баъд аз он, довталаб аз санҷишҳои зарурӣ, аз ҷумла бақайдгирии биометрӣ, санҷиши мавҷуд набудани доғи судӣ, омӯзиш ва муоинаи тиббӣ мегузарад.
Пас аз бомуваффақият анҷом ёфтани ҳамаи марҳилаҳо, шартномаи меҳнатӣ бо корфармо ба имзо расонида шуда, ҳуҷҷатҳои зарурӣ барои сафар омода мегарданд. Баъдан шаҳрванд ба Россия сафар карда, фаъолияти меҳнатии худро оғоз менамояд ва дар ҳолати зарурӣ аз дастгирии мақомоти дахлдор бархурдор мегардад.
Раванди мазкур аз ҷониби мақомоти давлатии Ҷумҳурии Тоҷикистон ва Федератсияи Россия ҳамоҳанг карда шуда, шаффофият ва эътимоднокии онро таъмин менамояд.
