Ҳангоми гум кардани ҳуҷҷатҳо дар Федератсияи Россия чӣ бояд кард?
Шумо — шаҳрванди Ҷумҳурии Тоҷикистон ҳастед, ки дар Россия кор мекунед ва ҳуҷҷатҳои худро гум кардед. Муҳим аст, ки зудтар амал кунед, то аз ҷарима, ихроҷ шудан ё мушкилоти дигар пешгирӣ намоед. Гум кардани ҳуҷҷат худ аз худ сабаби ихроҷ ё бекоршавии иҷозатномаи корӣ намешавад, вале оҷилан барқарор кардани он барои будубоши қонунӣ дар Россия зарур аст.
Барои барқарор кардани шиноснома — ба Консулгарии наздиктарини Тоҷикистон муроҷиат кунед; барои дигар ҳуҷҷатҳои муҳоҷиратӣ ё корӣ — ба Раёсати оид ба масъалаҳои муҳоҷирати Сарраёсати Вазорати корҳои дохилии Федератсияи Россия (УВМ ГУ МВД России) ё маркази муҳоҷиратии наздиктарин муроҷиат намоед.
Муҳоҷири меҳнатӣ ҳангоми гум кардани ҳуҷҷатҳо (шиносномаи хориҷӣ, корти муҳоҷиратӣ, патент ё дигар ҳуҷҷат) дар Россия корҳои зеринро бояд анҷом диҳад:
Қадамҳои аввал
1. Фавран ба шуъбаи полис хабар диҳед
• Ба шуъбаи наздиктарини полис (ОМВД России) дар ҷое, ки ҳуҷҷат гум шудааст, муроҷиат кунед.
• Ариза дар бораи гум шудан ё дуздӣ шудани аснод нависед. Ба шумо маълумотнома (талон-уведомление / справка) бобати қабули аризаатон медиҳанд — ин ҳуҷҷати асосӣ барои қадамҳои минбаъда аст.
• Агар корти муҳоҷиратӣ (миграционная карта) гум шуда бошад, дар ариза маълумоти вурудатонро ба Федератсияи Россия нависед (муҳр дар шиноснома, агар боқӣ мондааст).
• Муҳлат: беҳтараш ҳамон рӯзи гум кардани ҳуҷҷат муроҷиат кунед.
2. Агар шиносномаатонро гум кардед, бо маълумотномае, ки аз шуъбаи полис гирифтед, ба наздиктарин консулгарии Ҷумҳурии Тоҷикистон дар минтақаи қарордоштаатон муроҷиат кунед.
• Консулгарӣ барои барқарор кардани шиносномаи хориҷӣ кӯмак мекунад.
• Ҳуҷҷатҳои лозима:
o Ариза (дар консулгарӣ пур мешавад)
o Маълумотнома аз полис ҳамчун тасдиқи муроҷиат оиди гумшавии ҳуҷҷат
o акси 3,5×4,5 см (2 дона)
o Нусхаи дигар ҳуҷҷатҳо (агар бошанд: нусхаи шиносномаи хориҷӣ ва дохилии Тоҷикистон ва ғ.)
o Пардохти боҷи давлатӣ
• Муҳлат: барқароркунии шиноснома аз 2 ҳафта то 2 моҳ, вобаста ба навбат
• Ҳуҷҷати муваққатӣ:
o “Шаҳодатномаи бозгашт ба Ватан” — ҳуқуқи сафар ба ватан ( бозгашт), бо эътибори як моҳа. Дар як руз омода мешавад.
• Суроға ва тамосҳои консулгариҳои Тоҷикистон дар Россия:
Хадамоти консулии Сафорати ҶТ дар Маскав
121069, ш. Москва, кӯчаи Скатертний, 19
+7 (985) 740-02-12
consulate.moscow@mfa.tj
Маълумот аз соати 14:00 то 16:00 (душанбе–ҷумъа)
Консулгарии генералии ҶТ дар Санкт-Петербург
191024, ш. Санкт-Петербург, кӯчаи Черняховского 65
+7 (812) 490-47-46
tajgencons.piter@mfa.tj
Консулгарии генералии ҶТ дар Уфа
ш. Уфа, кӯчаи Цурюпы 149
+7 (347) 276-52-96
tajconsufa@mfa.tj
Консулгарии генералии ҶТ дар Екатеринбург
620107, ш. Екатеринбург, кӯчаи Гражданская, 2А
+7 (343) 370-23-60
tajconsek@mfa.tj
Консулгарии генералии ҶТ дар Новосибирск
ш. Новосибирск, кӯчаи Дзержинский, 20
+7 (383) 305-44-61, +7 (383) 305-44-63
tajgencons.nsk@mfa.tj
3. Барқарор кардани ҳуҷҷатҳои муҳоҷиратӣ
• Ба шӯъбаи (ОВМ МВД) (шуъбаи муҳоҷират) дар маҳалли зист ё МБМ (Маркази бисёрсоҳавии муҳоҷиратӣ) муроҷиат кунед.
• Барои корти муҳоҷиратӣ: ариза, нусхаи шиноснома ва маълумотнома аз полис пешниҳод кунед.
• Барои бақайдгирӣ: агар муҳлати бақайдгирӣ гузашта бошад, бо кумаки соҳиби манзил худро дубора ба қайд гузоред. Лозим аст: шиноснома, корти муҳоҷиратӣ, расиди пардохти андоз аз патент, шартномаи иҷора.
• Барои патенти корӣ: дар ҷое, ки патент гирифтед, ариза нависед ва расидҳои (квитансия) пардохтро (агар бошад) замима кунед. Патенти гумшуда бекор мешавад ва нусхаи нав дода мешавад.
• Муҳимот: бе ҳуҷҷат кор кардан манъ аст. Корфармо метавонад рухсатии 30-рӯза диҳад, то ҳуҷҷатҳоро барқарор кунед.
4. «Корти сабз» — ҳуҷҷати ҳатмии муҳоҷири меҳнатӣ
• Корти сабз (ҳуҷҷате, ки сабти изи ангушт, акс ва муоинаи тиббиро тасдиқ мекунад) барои ҳамаи муҳоҷирони меҳнатӣ ҳатмист.
• Агар гум шавад, бо нусхаи шиноснома ва маълумотнома аз полис ба МБМ муроҷиат кунед.
• Муоинаи такрорӣ осонтар аст: изи ангушт ва акс ройгон, муоинаи тиббӣ аз 3000 то 5000 рубл.
• Муҳлат: то 30 рӯз аз рӯзи муроҷиат.
• Дар шаҳри Москва — дар МБМ “Сахарово” мегузаронанд.
5. Барномаи “Амина” — ҳисобгирии рақамӣ барои муҳоҷирон дар Москва
• Аз 1 сентябри соли 2025 дар Москва ва вилояти Москва низоми ҳатмии таҷрибавии баҳисобгирии муҳоҷират тавассути замимаи мобилии «Амина» барои муҳоҷирони меҳнатӣ аз Тоҷикистон ва дигар кишварҳои бидуни раводид ҷорӣ карда шуд. Он бақайдгирии коғазиро иваз мекунад, ба таври худкор геолокатсияро интиқол медиҳад (барои тасдиқи суроғаи истиқомат) ва дар огоҳиномаҳо дар бораи ҳолат кӯмак мекунад.
• Агар ҳуҷҷатҳо гум шаванд, «Амина» — ро аз RuStore боргирӣ кунед (Барои iOS ҳанӯз расман дастрас нест) ва бо рақами телефон ворид шавед. Барнома ба шумо имкон медиҳад, ки суроғаро тасдиқ кунед ва қайди қонунӣ дошта бошед. Агар маълумоти ҷойгиршавиатон зиёда аз 3 рӯзи корӣ интиқол дода нашавад, шумо аз қайд бароварда мешавед ва ба феҳристи шахсони назоратшаванда дохил карда мешавед (ҷарима то 5000 рубл ва хатари ихроҷ шудан).
• Маслиҳат: агар имконпазир бошад, пешакӣ насб кунед. Дар сурати нокомӣ ( мушкилоти техникӣ) ба ВКД ФР тавассути хатти боварии 8 (800) 222-74-47 ё ба МБМ муроҷиат кунед. Барнома ройгон аст, аммо интернети доимиро талаб мекунад. !!!МУҲИМ!!! Барномаи VPN-ро истифода набаред, зеро ҳангоми истифодаи VPN ҳангоми ирсоли маълумоти ҷойгиршавиатон, метавонад маълумоти дигари хориҷӣ дода шавад ва шумо ба феҳристи шахсони назоратшаванда дохил карда мешавед!
6. Ба корфармо хабар диҳед ва ҳуқуқҳои худро ҳифз намоед
• Фавран корфарморо огоҳ кунед ва нусхаи маълумотномаи полисро ба корфармо пешкаш кунед. Агар қонунӣ фаъолият дошта бошед, тамоми нусхаҳои ҳуҷҷатҳои шумо дар шуъбаи кадрҳои корхона мавҷуд ҳастанд. Ин нусхаҳо барои барқарор кардани ҳуҷҷатҳои гумшуда кумакатон мерасонад.
• Корфармо наметавонад танҳо барои гум кардани ҳуҷҷатҳо шуморо аз кор ронад.
• Агар бо патент кор кунед — пешпардохтро (фиксированный авансовый платёж) идома диҳед, то мақоми қонунии худро аз даст надиҳед.
• Агар суғуртаи тиббӣ (полиси ДМС) гум шавад — ба ширкати суғуртавӣ бо маълумотнома полис муроҷиат кунед.
7. Маслиҳатҳои иловагӣ
• Агар хоҳед ба Тоҷикистон баргардед — аз “шаҳодатномаи бозгашт”, ки онро Консулгарии Тоҷикистон медиҳад, истифода баред. Дар Тоҷикистон барои барқарор кардани шиноснома ба шӯъбаи корҳои дохилӣ муроҷиат кунед.
• Тавсия: ҳамеша нусхаи ҳуҷҷатҳоро нигоҳ доред (дар телефон ё хона). Аслҳоро ба шахсони бегона надиҳед.
Кӯмак ва тамосҳо
Намояндагии Вазорати меҳнат, муҳоҷират ва шуғли аҳолии ҶТ дар Федератсияи Россия
Москва, кӯчаи Чаянова, 3/40
+7 (967) 271-02-02, +7 (988) 676-00-00, +7 (966) 031-22-22, +7 (936) 174-19-92, +7 (926) 586-03-00
WhatsApp: +7 (999) 912-58-68
Уфа: +7 (926) 311-52-53
Санкт-Петербург: +7 (977) 963-25-69
Новосибирск: +7 (901) 344-77-77
Иркутск: +7 (929) 388-54-11
Хабаровск: +7 (909) 809-55-48
Екатеринбург: +7 (999) 341-45-99
prmstj@mail.ru
Хатти оҷили МВД-и Россия: 8 (800) 222-74-47
Оқибати беэътиноӣ: агар чора наандешед — ҷарима аз 2000 то 7000 рубл, ихроҷ ё манъи вуруд ба Федератсияи Россия.
Мувозиби худ ва наздиконатон бошед!
