Корҳои фаҳмондадиҳӣ миёни муҳоҷирони меҳнатӣ

Бо мақсади расонидани маълумоти дақиқ ва пешгирии ба вуқӯъ омадани нофаҳмиҳо ҳангоми барасмиятдарории ҳуҷҷатҳои будубош ва фаъолияти меҳнатӣ, бахусус дар шароити анҷоми маҳдудиятҳо марбут ба пешгирии паҳншавии сирояти коронавирус аз чониби Намояндагии Вазорати меҳнат, муҳоҷират ва шуѓли аҳолии ҶТ дар ФР оид ба муҳочират дар манотиқи гуногуни Федератсияи Россия миёни муҳоҷирони меҳнатӣ силсилаи мулоқоту вохӯриҳоро амалӣ менамояд.
Дар вохӯрие, ки имрӯз, санаи 11 июни соли 2020 дар маҳалли сохтмонӣ, воқеъ дар ҳудуди шаҳри Троитски вилояти Москва баргузор гардид, ба муҳоҷирони меҳнатии тоҷик масъалаҳо вобаста ба навгониҳои қонунгузории федералӣ оид ба будубош ва фаъолияти меҳнатӣ, риояи талаботҳои зиддиэпидемикӣ байни муҳоҷирон ва эҳтиёткорӣ аз шахсони қаллоб, к ибо фуруши чиптаҳои қалбакӣ машѓуланд, баррасӣ шуданд.
Зимни сӯҳбат маълум гардид, ки дар ташкилоти сохтмонии ҶДММ «РСК», ки ба сохтмони анборҳои калонҳаҷм машѓуласт, бештар аз 50 нафар шаҳрвандони тоҷик фаъолият доранд.
Дар тафовут ба дигар соҳаҳо бо сабабҳои маҳдудиятҳои зиддиэпидемикӣ кор дар иншооти мазкур қатъ нагашта буд ва ҳамватанони мо бо риояи талаботҳои пешгирии бемории Ковид-19 фаъолият доштанд. Хушбахтона, то индам ягон нафар аз шаҳрвандони мо ба ин беморӣ сироят нашудаанд.
Зимни сӯҳбат, ҳамчунин ба ҳамватанон рочеъ ба татбиқи таътили андози патенти корӣ, ки тибқи фармони дахлдори Президенти ФР аз 15 март то 15 июн ҷорӣ идома меёбад, маълумот дода шуд, ки мувофиқи он, баъди 15 июн дар сурати ба анҷом расидани мӯҳлати патент, шаҳрвандон метавонанд, бидуни убури сарҳад аз нав барои барасмият даровардани патенти нав ба марказҳои муҳоҷират муроҷиат намоянд.
Ҷиҳати тамдиди мӯҳлати бақайдгирӣ, яъне регистратсия низ иттилоъ дода шуд, ки баъди 15 июн муҳоҷирон метавонанд бо ҳамроҳии ҷониби қабулкунанда ба шӯъбаҳои кор бо муҳочирати маҳалли иқомташон рафта, санади будубошашонро тамдид кунанд.
Дар робита ба масъалаи бозгашт ба ватан, ба самъи муҳочирон расонида шуд, ки айнизамон ба ягон намуди нақлиёт, аз ҷумла ҳавопаймо, қатора, мусофирбар иҷозати расмӣ дода нашудааст ва ҳамватанон набояд ба пешниҳодҳои бархе аз шахсони қаллоб, ки вақтҳои охир тавассути шабакаҳои интернетӣ ваъдаҳои беасос дода, чиптаҳои қалбакӣ мефурӯшанд, бовар накунанд.
Оѓози алоқаҳои нақлиётӣ ва кушода шудани роҳҳо байни Тоҷикистону Россия ва дигар давлатҳо тавассути манбаҳои расмӣ хабар дода мешавад. Ва он гоҳ хоҳишмандон метавонанд чиптаҳоро харидорӣ намуда, ба сафар бароянд.